Search
  • Tónverkamiðstöð | IMIC

Frá Salnum í Kópavogi: Fjögur tónskáld valin til þátttöku í Tónverki 20/21 í Salnum



Tónskáldin Ásbjörg Jónsdóttir, Sigurður Árni Jónsson, Gunnar Karel Másson og María Huld Markan Sigfúsdóttir hafa verið valin úr hópi sextán umsækjenda til að semja strengjakvartetta fyrir Salinn.


Tónverk 20 / 21 er nýtt verkefni hjá Salnum og er markmiðið að stuðla að frumsköpun í tónverkagerð og að kynna íslensk tónskáld. Tónskáldin munu semja strengjakvartetta sérstaklega með Salinn í huga. Verkin verða síðan frumflutt næsta vetur í Tíbrá, tónleikaröð Salarins. Samstarfsaðili Salarins í Tónverki 20 / 21 er Strokkvartettinn Siggi sem mun frumflytja verkin.


„Það er mikið gleðiefni fyrir okkur í Salnum að fá þessi fjögur öflugu tónskáld til liðs við okkur. Þau eru hvert öðru ólík í tónsköpun og getum við búist við fjölbreyttum strengjakvartettum næsta vetur“, segir Aino Freyja forstöðumaður Salarins. En eitt af hlutverkum Salarins er að stuðla að frumsköpun í tónverkagerð og að efla nýsköpun í tónlist.


Í valnefnd sátu Atli Ingólfsson fyrir Salinn, Karólína Eiríksdóttir fyrir Tónskáldafélag Íslands og Una Sveinbjarnardóttir fyrir Strokkvartettinn Sigga.


Ásbjörg Jónsdóttir lauk meistaraprófi í tónsmíðum frá Listaháskóla Íslands. Hún hefur breiðan tónlistarlegan bakgrunn, allt frá djasssöng til kórastarfs en hefur þroskað tónsmíðagáfu sína jafnt og þétt í eftirminnilegum kammerverkum sem sameina léttleika og ljóðrænu.


Gunnar Karel Másson lauk meistaraprófi í tónsmíðum frá Tónlistarháskólanum í Kaupmannahöfn en segja má að heimspeki og leikhús eigi ekki minni skerf af honum en tónlistin. Hann hefur tekið þátt í uppsetningu fjölda leiksýninga og samið eða sniðið hljóðheim þeirra. Tónverk hans eru gjarnan eins og leiksvið þar sem hugmyndir takast á.


María Huld Markan Sigfúsdóttir gjörþekkir fiðluna sem flytjandi og hefur í nokkrum tónverkum sínum undanfarið kannað hljóðheim hennar á frumlegan hátt. Hún nam tónsmíðar við Listaháskóla Íslands og hefur mikla reynslu sem tónskáld og flytjandi. Auk kammerverka hennar, sem hafa verið tekin upp og flutt víða um heim hefur hún samið fyrir hljómsveit og tónlist við nokkrar kvikmyndir.


Sigurður Árni Jónsson lauk meistaraprófi bæði í tónsmíðum og hljómsveitarstjórn í Svíþjóð. Hann stjórnar Ensemble Dasein í Gautaborg og hefur rannsakað ýmis blæbrigði kammerskriftar á sannfærandi hátt, en hann lauk nýverið þátttöku í Yrkju með Sinfóníuhljómsveit Íslands sem er starfsþróunarverkefni Tónverkamiðstöðvar fyrir ný tónskáld.


Tónverk 20 / 21 er styrkt af Lista- og menningarráði Kópavogsbæjar og unnið í samvinnu við Tónverkamiðstöð Íslands.

©2020 by Iceland Music Information Centre